Bakailaua bizkaitar saltsan

Bakailaua bizkaitar saltsan Bizkaiako errezeten artean ezagunenetakoa da. Betiko errezeta, benetan gozoa. Honako hau, Juantxu Larruzearen eskutik dakargu. 2011ko abenduan Garaiko Otea-Loran txokoan emandako gastronomia ikastaroan jasota.

Osagarriak

  • 3 baratxuri ale
  • 4 koilarakada oliba olio
  • Kilo bat bakailaua (10 bat xerra)
  • Llitro eta erdi bizkaitar saltsa

  • Zailtasuna Erraza
  • Denbora 20 minutu
  • Anoak 5 lagunentzako



Pausuak

  • 1. 
    Baratxuriak zuritu eta ale bakoitza bitan zatitu. Lapiko handi batean 4 koilarakada oliba olio epeltzen jarri. Berakatza oliotara bota. Behin kolore apur bat hartzen dutenean, berakatzak oliotik atera.
  • 2. Olioa bero dugula bakailau xerrak lapikoan jarri, hasieran narrua behera begira, eta pare bat minutu ondoren buelta eman.
  • 3. 
    Xerrei buelta eman eta minutu batera bizkaitar saltsa botatzen hasi. Poliki-poliki egingo dugu. Burruntzalikaz burruntzalika. Saltsa pixka bat bota eta bakailauarekin bat egin. Saltsa guztia bota ondoren, bakailaua estali arte, egosten eduki minutu batzuk. Prest izango dugu bakailau platerkada ederra jateko. Baserriko ogia eta gure edari gogokoenaz uztartzen baditugu, sekulako bazkaria izango dugu.

Argazki galeria